އާންމު ބަަހުރުވައިން ފާތުމަ ނުވަތަ ފާތިމަތު މި ނަމަކީ ވަރަށް ރީތި ނަމެކެވެ. އަޅުގަނގެ މަންމަ ފަރާތުގެ މާމަގެ ނަމެވެ. މި ފޮންޓަށް މި ނަންދޭން ނިންމީ މާމަގެ ހަނދާން އާކޮށް އެތައް ބަޔަކަށް ބޭނުންހިފިދާނެ ރަނގަޅު މަސައްކަތެއް ކުރުމުގެ ބޭނުމުގައެވެ. މާމަ ކައިރި ފިނިފެންމާގޭގައި މާމަގެ ފިނިފެންމަލާއި ހުވަނދުމާ، އަދި އަސުރުމަލުގެ ހިތްފަސޭހަ ބަގީޗާަގައި ހެދަކުރެވުނު އުފާވެރި ހަނދާންތައް ފިލާ ނުދެއެވެ. ލުބޯނގަސް ދޮށުގައި ފަތްޖެހި އެނދެއްގައި، ބައެއްފަހަރު ގޮނޑިއެއްގައި ނުވަތަ ޖޯލިފަތީގައި މާމަ ކައިރި ހޭދަވީ ކޮންމެ ސިކުންތަކީ ހާދަ އުފާވެރި ވަގުތުތަކެކެވެ. މާމަ ގެންގުޅުނު ބޮޑު ހަތިމުން މާމަ ކައިރި އިނދެ އަކުރު ކީ ދުވަސްތައްވެސް އެހާމެ ހަނދާންވެއެވެ. މާމަގޭ ބޮޑު އަށިން މަޅު ނަގައިގެން ރާޅާ އަޅަން ދަމެވެ. މިހެން ގޮސް ލިޔާނަމަ ވަރަށް ގިނަ އުފާވެރި ހަނދާންތަކެވެ. ރަށަށް ގެނެވުނު ފުރަތަމަ ކޮންޕިއުޓަރ ދޮންބޭބެ މާލެއިން އައި ފަހަރަކު ރަށަށް ގެނެސް މާމެގޭގައި ބޭންދިއިރު މިފަދަ ކަމެއް ހިތައްވެސް ނުގެނެވެއެވެ. އޭރު ދެބެންގެ ދެދަރި ބޭބެ (ނިޒާމު ނުވަތަ އަހުމަދު އަދުނާން) މާލޭގައި ހުރެފައި ރަށަށް އައިސް ކޮންޕިއުޓަރ ކައިރި އިންނައިރު އަހަރުމެން ބަލަން ތިބެމެވެ. އަތްލާކަށް ނުކެރެއެވެ. ވާނުވާ ނޭގޭތީ ނުކެރެނީއެވެ. ނިޒާމްބެ އަކީ ޓީވީއެންގައި ގިނަ ދުވަސްތަކެއް ވަންދެން މަސައްކަތް ކުރުމަށްފަހު މިހާރު ދިރާގުގައި މަސައްކަތް ކުރާ ބޭބެއެކެވެ.